F.C. Blo-Wäiss Izeg

DAMMEFUTTBALL ZU IZEG

Am Joer 1993 - zu enger Zäit, wou et zu Lëtzebuerg keen Dammechampionnat am Futtball gouf - sinn eng Rei Meedercher un de Comité erugetrueden matt der Iddi, eng Dammenekipp ze grënnen. Dee Moment hu wuel di mannsten domatt gerechent, dass eben dës Dammenekipp och nach 2021 e feste Bestanddeel vum FC Blo-Wäiss Izeg wäert sinn.

1993 huet de Comité vum Izeger Futtball agewëllegt, eng Dammenekipp an de Veräin ze integréieren. Den Training gouf ganz am Ufank vum Marc Lies gehalen, duerno vum Carlo Oé a Raoul Weinzierl. Si allen dräi hunn dofir gesuergt, d'Ambiance am Grupp héichzehalen, awer gläichzäiteg och vill Fussballwëssen vermëttelt.

D'Izeger Dammenekipp hëlt um Championnat deel

Bis 1997 goufe just vereenzelt Frëndschaftsmatcher gespillt, ier et ab der Saison 1997/98 eescht ginn ass. Et gouf no laange Joeren endlech nees e Lëtzebuerger Dammefuttball-Championnat ausgedroen, wou d'Izeger Dammen vun Ufank un matt derbäi waren, an dat bis haut onënnerbrach an der iewëschter Liga!

Ënnert Anerem waren am Kader vun der éischter Izeger Dammenekipp:

Cindy de Sousa, Carole Feltgen, Myriam Feyder, Manon Fischer, Martine Hoffmann, Nicole Kemp, Christiane Kieffer, Tania Muschter, Annick Olinger, Patricia Raus, Monica Scarsellato, Sandra Schintgen, Sandra Schiumarini, Sophie Stelet, Nancy Teller

No der Saison 1997/98 hunn de Carlo Oé an de Raoul Weinzierl d'Traineramt un de Pit Repusic weiderginn, dee während 3 Joer eng zolidd Aarbecht geleescht huet.

Nodeems de Pit Repusic um Enn vun der Saison 2000/01 opgehal huet, sollt dem Comité matt der Verflichtung vum Nico Ruppert e richtege Glécksgrëff geléngen, blouf hien dach Trainer vun 2001 bis 2009.

Eemolegen Ekippegeescht

Matt de Joeren ass d'Dammenekipp méi a méi zesummegewuess an huet bestach duerch hiren onbännegen Ekippegeescht, an dat souwuel um, wéi och niewent dem Terrain. E Bal oder e Fest zu Izeg war ouni d'"Izeger Hénger" (wéi si sech selwer genannt hunn) kaum nach virstellbar.

Vun 2001 un huet sech d'Ekipp un der Spëtzt vun der Ligue 1 festgesat. Dobäi ass jeweils eng 3. Plaatz (2003/04 an 2005/06) an d'Erreeche vun der Halleffinall vun der Coupe des Dames (2002/03 an 2003/04) ervirzehiewen.

Erfollegräich Joeren

Uganks der Saison 2006/07 hunn d'Izeger Dammen sech mam Stater Racing zesummegedoen, an sou ass d'Entente Izeg/RFCUL entstanen. An der Saison 2006/07 gouf déi gutt 3. Plaz aus dem Virjoer widderholl.

Den Héichpunkt war awer ouni Zweifel d'Saison 2007/08. D'Ekipp vum Nico Ruppert huet an däer Saison de Futsal gewonn, war Finalist an der Coupe des Dames an doniewt nach Vizechampion. Et gouf deemno e Stéck Geschicht geschriwwen.

INDOOR-CHAMPION 2008

De 27. Januar 2008 konnt d'Entente Izeg/RFCUL den Titel vum Lëtzebuerger Hale-Champion feieren, deen éischten a bis dato eenzege Landesmeeschter-Titel fir den FC Blo-Wäiss Izeg.

CHAMPIONS-EKIPP "FUTSAL":

Catherine Keipes, Sharon Schanet, Samiah Poiré, Tanja Jean, Ann Kahlki, Lynn Ruppert, Sanae Amil, Manon Fischer, Catherine Fröhlich, Vicky Armstrong, Signe Thomsen, Carina Alves

E weidere memorablen Datum an der Veräinsgeschicht war den 30. Mee 2008. An der Finall vun der Coupe des Dames stoungen sech um Escher Gaalgebierg d'Entente Izeg/RFCUL an den FC Mamer géigeniwwer.

Och wann dëse Match leider matt enger 1:4 (0:0)-Nidderlag fir eis Meedercher op en Enn goung, esou kruten d'Supporter dach e spannenden an ofwiesslungsräiche Match gebueden.

Nëmmen eng Woch méi spéit koum et zum nächste Showdown tëschent denen zwou Ekippen. Um leschte Spilldag vum Championnat stoungen sech d'Entente Izeg/RFCUL an de punktgläichen Leader Mamer zu Izeg géigeniwwer.

Fir Champion ze ginn, hätten eis Meedercher misse gewannen. Um Enn konnt sech awer Mamer matt 3:2 (3:1) duerchsetzen, an der Entente ass just d'Éireplaatz bliwwen.

Duerchwuesse Joeren

Nom Experiment mam RFCUL goung d'Izeger Dammenekipp och déi Joeren duerno als Entente un den Départ. An der Saison 2009/10 als Entente Izeg/Bous, an dat ënnert dem Trainer Jeff Koob.

No der Fusioun vun der US Bous matt der AS Réimech ass d'Ekipp 2010/11 als Entente Izeg/URB opgelaf. Mëtten an däer Saison huet de Mars Noesen de Jeff Koob als Trainer ofgeléist.

Déi véier Joer duerno stoung d'Izeger Dammenekipp nees op eegene Féiss. Noutgedrongen krut d'Ekipp en anert Gesiicht an, bedéngt duerch en ëmmer méi grousse Konkurrenzkampf an der Ligue 1 koum et zu engem schläichenden Ofrutschen an den Tabellekeller.

Dës Joeren ware gekennzeechent vu villen Trainerwiesselen. Nom Mars Noesen ware mam Thierry Reinert, Georges Bianchini, Nico Ruppert, Yves Block, Jeff Besch a Pietro Gentile sechs weider Traineren matt méi oder manner groussem Erfolleg um Rudder.

Zumols 2013/14 an 2014/15 war Ofstiegskampf pur ugesot, an eréischt ganz zum Schluss konnt de Maintien an der iewëschter Klass gefeiert ginn.

Virun der Saison 2015/16 hunn sech den FC Blo-Wäiss Izeg an d'Jeunesse Kanech op eng Zesummenarbecht am Dammeberäich geénegt. D'Ekipp gouf, no der Demissioun vum Yves Block, fir d'éischt vum Alain Lahyr (interim) an duerno vum Franck Bento trainéiert.

An der Saison 2016/17 an 2017/18 sinn eis Meedercher als Entente Izeg/Kanech/Cebra opgelaf a ginn säit dem Réckzuch vu Kanech am Summer 2018 als Entente Izeg/Cebra un den Départ.

No dräi Joer an der Verantwortung gouf de Fernando Reis da Silva 2019 vum Laurent Erlinger ofgeléist. Fir de Rescht vun der Saison huet d'Chantal Graas den Interim garantéiert.

Fir d'Saison 2021/22 gouf mam Bruno Monteiro en neien Trainer fir d'Entente Izeg/Cebra engagéiert, dee sengersäits an Tëschenzäit nees vum Fernando Reis da Silva ofgeléist gouf, ier nees d'Chantal Graas d'Ekipp bis zum Schluss vun der Saison iwwerholl huet.