GRËNNUNG VUM FC BLO-WÄISS IZEG

 
KRICHSJOREN
 
Am Joer 1941, während dem Zweete Weltkrich, hunn en etlech jonk Leit den Entschloss gefaasst, fir zu Izeg e Futtballclub ze grënnen. Eng Partie vun den Izeger Spiller hat scho virdrun an anere Veräiner (virun allem der Union) gespillt.
 
Den Alex Becker gouf éischte President vum neigegrënnten "FC Blô-Weiss Itzég", woubäi dësen Numm huet missen an "FK Blau-Weiß Itzig" emgeännert ginn. Éischte Keessier vum Club war de Robert Kalmus, Sekretär gouf de Jules Wintringer.
 
Doniewt koumen Jos. Remackel, Erny Remakel, Marcel Reuter, René Zeimes an Norbert Winter an de Comité.
 
D'Keess matt ronn 320 Frang an d'Uniformen krut eise Club vum fréiere Cercle Sportif Itzig geschenkt. Nodeem all Formalitéiten erledegt waren, konnt den neie Veräin seng sportlech Aktivitéiten ophuelen.
 
170462b243995a43353a50564e9b3f7ec800f7_.jpeg
 
Grënnungsmatch zu Mutfert
1.Rei vu lénks no riets: Lucien HARSCH, Nicolas WINTER, Marcel REUTER
2.Rei vu lénks no riets: Ady ZEIMES, Jos ZEIMES, Armand JOHANNS, Marcel BOUR, Jos REMACKEL, Erny REMAKEL, Mich HENSGEN, Pierre POHS, René ZEIMES, Marcel STEFFEN

DÉI ÉISCHT MATCHER
 
Den éischte Match gouf am Juni 1941 mat 7:1 zu Mutfert gewonnen.
 
Och am zweete Match hunn déi Blo-Wäiss näischt ubrenne gelooss, zu Sandweiler gouf et en däitlechen 9:1-Succès. Wierklech e gudden Ufank! An der Tëschenzäit hat de Nic. Winter de Jules Wintringer als Sekretär ofgeléist.
 
D'Heemmatcher goufen "an den Espen" ausgedroen, wou den Nic. Dresch-Thill eng Wiss zur Verfügung gestallt hat.
 
170462050d0a1f73fde3a311e77a94722c5900_.jpeg
 Éischte Veräinsstempel (24. September 1941)
 
Vun 1943 un ass et verständlecherweis ëmmer méi schwiereg ginn, fir eng Ekipp op d'Been ze kréien. Vill Spiller goufen an de "Reichsarbeitsdienst" agezunn. Eleng duerch d'Emsiedlung vun der Famill Zeimes sinn dem Veräin 4 Spiller verluergaang.
 
 
NEIGRËNNUNG NO DER LIBERATIOUN
 
Direkt no der Liberatioun, de 27. September 1944, gouf de Veräin nei gegrënnt an huet sech den Numm „FC Blo-Weiss Itzeg“ ginn. De 16. Juni 1945 gouf en definitiv an d'F.L.F. opgeholl.
 
1945 ass de Metty Seywert neie President ginn, an ab 1945/46 gouf zu Lëtzebuerg nees e Championnat gespillt.