1920 hunn déi Izeger Futtballisten an hir Kollegen aus dem Theaterclub sech zesummegedoen fir den 13.Mee d'Fanfare Izeg ze grënnen. Dräi Joer duerno gouf den FC Excelsior opgeléist.
Am Februar 1926 war eng éischt Versammlung am Veräinslokal, dem Café Pier Grün-Sonntag (haut Café de la Place). D'Initiativ goung vum Jean Becker, Mett Sonntag, Jacques Zahlen, Aloyse Zeimes an Désiré Zahlen aus.
An der aler Schoul an der "Béierkaul" war dann am Mäerz d'Grënnungsversammlung vum zweeten FC Excelsior Itzig. An der Comité koumen Jean Becker (President), Nic Braun (Vizepresident), Mett Sonntag, Mic. Walesch, Jacques Zahlen, Aloyse Zeimes an Désiré Zahlen.
Den Terrain war "am Nuddeler", dat éischt Joer ass nach "wëll" gespillt ginn. D'Uniforme ware schwaarz Trikoen matt engem giele Revers, giele Manchetten an enger gieler Sträif an der Taille.
FC EXCELSIOR II
1.Rei vu lénks no riets: Michel ZAHLEN, Albert ZAHLEN, ?
2.Rei vu lénks no riets: Paul HENSGEN, ?, Jean BECKER
3.Rei vu lénks: Jos SONNTAG, Nic LANTER, Mich WOLF, Hary COLLING, Tun SCHNEIDER, ?, Jos REMACKEL, Jean-Pierre LANTER, Jacques ZAHLEN
Fir d'Saison 1927/28 war den FC Excelsior II am FLF-Championnat ugemellt an huet zesumme matt Stengefort, Uewerkäerjéng, Walfer a Weimëschkierch am zweete Bezirk vun der drëtter Divisioun gespillt.
Eis Jongen hate leider kee Match gewonn a kee Punkt kritt. Domatt war den éischten an zugläich leschte Championnat vum éischten offiziellen Izeger Futtballclub eriwwer.
Den FC Excelsior II huet doropshin och direkt opgehal ze bestoen.